Vdes një turist austriak teksa ishte me pushime në Shqipëri

Mediat në Shqipëri raportojnë se një turist austriak ka humbur jetën në orët e para të mëngjesit, të kësaj të hëne, në spitalin e qytetit të Korçës, ku ai ishte dërguar për marrjen e ndihmës mjekësore, transmeton albinfo.ch.

Sipas raportimeve, turisti i moshuar nuk ishte ndier mirë rreth orës 03:00 të mëngjesit, ku kishte shfaqur probleme kardiake, ndaj ishte dërguar me urgjencë në spital për marrjen e ndihmës së nevojshme mjekësore, por fatkeqësisht nuk ia ka dalë dhe ka ndërruar jetë.

“Mëngjesin e sotëm, në spitalin e Korçës, ka humbur jetën shtetasi austriak V. S., 72 vjeç, i cili ishte dërguar në spital pasi ka shfaqur probleme kardiake, rreth orës 03:00, në hotelin ku ishte akomoduar. Po punohet për përcaktimin e shkakut të saktë të vdekjes së 72-vjeçarit. Paraprakisht, dyshohet për shkaqe natyrale”, njofton policia e shtetit shqiptar.