Vende për zanat: Më shumë oferta sesa kërkesa

Kompanitë janë duke luftuar për të gjetur të rinj për zanat

“Është një problem i madh”, pranon drejtori i Unionit për punësim, Hans-Ulrich Bigler. Ai aludoi për rritjen e numrit të kompanive të cilat kanë vështirësi të gjejnë të rinj për zanat. Sipas portalit zviceran për orientim shkollor, aktualisht më shumë se 14,000 vende janë bosh. Ky është një fenomen i ri. Sipas Zyrës Federale për Arsim Profesional dhe Teknologji, që nga viti 2011 oferta e vendeve është më i lartë sesa e kërkesave.

Pasojë e këtij deficiti është se zgjedhja e nxënësve për zanat bëhet gjithnjë e më herët, nganjëherë deri në një vit më parë. Kjo përzgjedhje e parakohshme zgjat fazën e ofertave dhe vë kompanitë nën presion, vlerëson gazeta “Der Sonntag”. Ndërtimtaria është sektori më i prekur nga kjo dukuri: aktualisht rreth 2.500 vende janë të lira. Për më tepër, punëdhënësit ankohen se shumë të rinj preferojnë të kryejnë shkollat e larta.