Zgjedhjet në Shqipëri: Fletëvotimet do të dërgohen në diasporë deri më 17 prill

Ai u shpreh se fletët e votimit do të dërgohen në Diasporë, deri më 17 prill

Kreu i Komisionit Qendror të Zgjedhjeve në Shqipëri, Ilirjan Celibashi, në një konferencë me gazetarët zbuloi më shumë detaje rreth votimit për zgjedhjet e 11 majit.

Ai u shpreh se fletët e votimit do të dërgohen në diasporë deri më 17 prill.

Ecuria e procedurave ka vijuar normalisht dhe nuk janë hasur problematika, tha ai. Më tej theksoi se votuesi nuk do të paguajë asnjë kosto, pasi kjo do të mbulohet nga shteti shqiptar.

Celibashi gjithashtu nënvizoi se do të ketë vëzhgues vendas dhe ndërkombëtarë, si edhe përfaqësues të partive politike.

“Besoj se për 10 ditë ose dy javë do të vendosemi në disa pika të njësisë nr. 10 në Tiranë, ku do të instalojmë disa pajisje. Përveç udhëzuesve, do të prezantohemi edhe në rrjetet sociale të KQZ-së. Sa i përket votimit nga brenda vendit, thuajse të gjitha aspektet përgatitore janë në përputhje me kalendarin e parashikuar. Ndërsa për votimin nga jashtë, kemi përzgjedhur tashmë edhe operatorin e shërbimit postar,” tha ndër të tjera ai.

 

---