11 kandidatë për ekzekutivin e Gjenevës

Në raundin e parë, socialdemokratët dhe të gjelbrit, që tradicionalisht mbizotërojnë politikën gjenevase, patën shënuar debakël

Pasi që në raundin e parë, të mbajtur më 6 tetor asnjëri nga kandidatët për qeverinë e Kantonit nuk kishin arritur shumicën absolute, nesër, (e diele) më 10 nëntor mbahet raundi i dytë, ku marrin pjesë 11 kandidatë. Në raundin e parë ishin 29 sish.

Më 6 tetor ka pasur një rrëshqitje të ndjeshme nga e djathta, me ç`rast pikërisht përfaqësuesit e Lëvizjes Qytetare të Gjenevës (MCG), një lëvizje populiste e djathtë, kishin shënuar rezultatet më të mira. Ndërsa socialdemokratët dhe sidomos të gjelbrit, që tradicionalisht mbizotërojnë politikën gjenevase, patën shënuar debakël. Në 6 vendet e para nuk bënte pjesë asnjë nga kandidatët e majtë.

Socialdemokratët marrin pjesë me kandidatët Anne Emery-Torracinta dhe Thierry Apotheloz. Bashkësia e të majtës “”Ensemble à gauche” nuk dërgon kësaj here asnjë kandidat. Ndersa deputeti nacional nga të gjelbrit, Antonio Hodgers do të kandidojë edhe njëherë.

Partitë FDP (PLR) dhe CVP (PDC) dërgojnë së bashku pesë kandidatë për ekzekutivin e kantonit. Ndërsa MCG dhe SVP/UDC shkojnë në raundin e dytë me treshen e përbashkët: Mauro Poggia, Eric Stauffer (nga MCG) dhe Celine Amaudruz (SVP/UDC).