26 vjet nga fillimi i bombardimeve të NATO-s

(KEYSTONE/EPA/Str)

26 vjet më parë, avionët e NATO-s nisën bombardimet ndaj objektivave ushtarake dhe policore të Jugosllavisë, një operacion që do të shënonte një moment vendimtar në historinë e Ballkanit dhe do të çonte në fundin e kontrollit serb mbi Kosovën.

Fushata ajrore e NATO-s nisi më 24 mars 1999, pasi negociatat ndërkombëtare për t’i dhënë fund dhunës në Kosovë dështuan. Marrëveshja e Rambujesë, e cila parashikonte një zgjidhje paqësore, u refuzua nga Beogradi, duke hapur rrugën për ndërhyrjen ushtarake të aleancës perëndimore.

Bombardimet, të cilat zgjatën 78 ditë, përfunduan më 10 qershor 1999, me miratimin e Rezolutës 1244 të Këshillit të Sigurimit të OKB-së. Ky dokument legjitimoi vendosjen e një administrate të përkohshme ndërkombëtare në Kosovë dhe dislokimin e trupave të KFOR-it, një forcë paqeruajtëse e drejtuar nga NATO-ja.

Ndërhyrja ushtarake e NATO-s hapi rrugën për kthimin e mbi 800 mijë refugjatëve shqiptarë, të cilët ishin larguar nga Kosova si pasojë e dhunës dhe spastrimit etnik të kryer nga forcat serbe. Pas përfundimit të administrimit ndërkombëtar, më 17 shkurt 2008, Kosova shpalli pavarësinë, një akt i njohur sot nga mbi 100 vende të botës, por i kundërshtuar nga Serbia.

Sot, rreth 4.700 trupa të NATO-s vazhdojnë të qëndrojnë në Kosovë në kuadër të misionit KFOR, duke mbetur një faktor kyç për sigurinë dhe stabilitetin në rajon, transmeton albinfo.ch.