70 për qind e ilegalëve, përmes kufirit jugor

Gjithsej sipas shefit të trupave të rojave kufitare Mauro Antonioni, janë kapur 7500 veta dhe u është ndaluar hyrja në Zvicër

Gjatë vitit 2012 në Zvicër, vetëm përmes kufirit jugor, në kantonin e Tesinës, janë shënuar 7500 hyrje ilegale, që është dukshëm më shumë se një vit më parë. Po kështu në këtë vijë kufitare janë kapur më shumë korrierë droge se më parë.

Mesatarisht në ditë janë kapur mbi 20 migrantë pa leje qëndrimi dhe janë kthyer mbrapa. Kështu thuhet në bilancin që trupat e mbrojtjes se kufirit e kanë prezantuar të enjten në Lugano. Sipas tyre, rreth 70 për qind e hyrjeve ilegale në Zvicër gjatë vitit të kaluar janë realizuar përmes Tesinës.

Gjithsej sipas shefit të këtyre trupave Mauro Antonioni, janë kapur 7500 veta dhe u është ndaluar hyrja në Zvicër. Ndërsa në nivel të Zvicrës gjatë po kësaj kohe janë shënuar 11 mijë ndalesa të tilla. Por në vitin 2011 kanë qenë vetëm 3800 veta që janë kapur në kufijtë jugorë dhe 5600 në nivel vendi.

Po ashtu është rritur edhe numri i korrierëve të drogës që gjatë vitit 2012  kanë rënë në rrjetin e ndjekësve në Tesinë. Nëse një vit më parë kanë qenë 266, në vitin 2012 bëhet fjalë për 309 sish.