Me marrëveshje, kundër shitjes së armëve zvicerane terroristëve

Marrëveshja synon parandalimin në radhë të parë të shitjes së armatimit bandave të armatosura dhe trupave të rebeluara

Zvicra është vendi i 63-të që ratifikon marrëveshjen ndërkombëtare që rregullon tregtinë globale me armë. Qeveria Federale me këtë veprim obligohet që armët e Zvicrës të mos bien në duar të gabuara. Kjo është marrëveshja e parë e cila në mënyrë detyruese kufizon tregtinë me armë. Zvicra ka qenë ndër vendet e para që kanë bashkëpunuar në përpilimin e kësaj marrëveshjeje.

Duke qenë se marrëveshja në fjalë nuk e kufizonte në masë të madhe industrinë ushtarake të Zvicrës, me raszon e nënshkrimit të saj nuk kishte pasur rezistencë të madhe politike. Marrëveshja synonte krijimin e transparencës në nivel global duke parandaluar në radhë të parë shitjen e armatimit bandave të armatosura dhe trupave të rebeluara.

Por me marrëveshje nuk ndalohet eksporti i armatimit në shtete të ndryshme, përfshirë këtu edhe ato ku shkelen të drejtat e njeriut. Ndalohet vetëm shitja e tyre kur vendi i caktuar me këto armë shkel të drejtat e njeriut. Në këtë mënyrë edhe më tutje lejohet shitja e aeroplanëve luftarakë, tankeve ose raketave kundërajrore në shtetet si Arabia Saudite, pakistani ose shtete tjera që kanë probleme të kësaj natyre, pasi që armët e përmendura nuk përdoren për shtypjen e demonstratave ose për torturim të njerëzve.

Megjithatë, kjo marrëveshje qe përshëndetur nga organizatat për mbrojtjen e të drejtave të njeriut si hap të rëndësishëm përpara. Atë planifikon ta nënshkruajë edhe SHBA si eksportuesi më i madh i armëve në botë, ndërsa Rusia dhe Kina janë kundër.