Më shumë preferojnë bilateralet me BE-në se inicativën e SVP-së

58 për qind të personave të pyetur do të zgjidhnin marrëveshjet bilaterale para zbatimit të iniciativës së përmendur të SVP-së, e cila kërkon kufizimin e ardhjes së të huajve në Zvicër

Zviceranët me të drejtë vote, po të kishin mundësi të zgjidhnin në mes të ruajtjes së marrëveshjeve bilaterale me BE-në dhe jetësimit të iniciativës së SVP-së kundër migrimit masiv, do të përcaktoheshin për të parën. Ndërsa në fakt këto dy çështje përjashtojnë njëra tjetrën.

Ky rezultat del nga një sondazh që ka realizuar instituti për hulumtimin e opinionit gfs.bern të sponsoruar nga federata që bën bashkë ndërmarrjet ekonomike swisscleantech dhe që e ka publikuar sot gazeta “SonntagsZeitung”.

Sondazhi në fjalë tregon se 58 për qind të personave të pyetur do të zgjidhnin marrëveshjet bilaterale më me dëshirë se zbatimin e iniciativës së përmendur të SVP-së, e cila kërkon kufizimin e ardhjes së të huajve në Zvicër. Vetëm 35 për qind të të anketuarve janë shprehur në favor të jetësimit pa asnjë zvarritje apo zbutje, inicativës. Ndërkaq, 7 për qind kanë zgjedhur përgjigjen “nuk di”.

Një shumicë e madhe kanë nxjerrë një bilanc pozitiv sa u përket bilateraleve. 71 për qind e të pyeturve kanë thënë se marrëveshjet në fjalë janë “shumë të mira” ose “megjithatë të mira” për Zvicrën. Mbështetja e tyre është bindëse pavarësisht nga gjinia, regjioni, mosha, ose nga fakti nëse të anketuarit jetojnë në fshat apo në qytet.

Nga ana tjetër, 52 për qind kanë votuar për një afrim më të madh me BE-në ndërkohë që 21% kanë qenë kundër këtij afrimi. 82% duan që Zvicra të ketë fjalën e saj në zhvillimin e mëtejmë të të drejtës evropiane.

79 për qind e të anketuarve janë shprehur në favor të pasjes së një instrumenti në formë të një klauzole mbrojtëse ose klauzole “ventil” për kontrollimin e migracionit