Rënie e eksportit zviceran gjatë shkurtit

Administrata doganore ka njoftuar se nëntë nga dhjetë degë ekonomike që eksportojnë, kanë regjistruar bilanc negativ

Ndërmarrjet zvicerane gjatë muajit shkurt kanë shitur më pak mallra jashtë vendit se sa në muajin paraprak. Sipas shënimeve të Administratës Federale të Doganave, eksportet zvicerane gjatë shkurtit kane rënë për 3.9 për qind ose në 16.1 miliardë franga. Kjo rënie vjen pas muajit janar i cili po ashtu kishte shënuar rënie në krahasim me muajin paraprak.

Administrata doganore ka njoftuar se nëntë nga dhjetë degë ekonomike që eksportojnë, kanë regjistruar bilanc negativ. E vetmja që ka shënuar ngritje të eksportit gjatë shkurtit ka qenë shitja e bizhuterisë dhe stolive.

Arsye e uljes së eksporteve ka qenë ngritja e fuqisë së frangut që ka ndodhur nga mesi i janarit. Veç zvogëlimit të sasisë së mallrave të eksportuara ka pasur ulje edhe të çmimeve, të detyruar po ashtu nga frangu i fortë.