Kolona e gjatë 12 kilometra para tunelit të Gothardit

Pushimet e Pashkëve janë gjithmonë rast kur pushuesit nga veriu, kryesisht nga Gjermania dhe pjesa gjermane e Zvicrës ia mësyjnë drejt jugut, Italisë e tutje. Dhe gjithmonë, masat e mëdha të njerëzve nëmakina duhet të kalojnë përmes të njëjtës “vrimë të gjilpërës”, gjegjësisht përmes tunelit Gotthard. Kështu, kolonat e stëgjata dhe tollovia janë të paraprogramuara.

Nga mëngjesi i të premtes, në autostradën A2, në hyrjen veriore të tunelit Gotthard është formuar një kolonë automjetesh, e gjatë rreth 12 kilometra që nënkupton pritje prej rreth dy orë e gjysmë të secilit.  Shërbimi për informim Viasuisse rekomandon që për udhëtimin në drejtim të jugut, pushuesit të kalojnë nëpër autostradën A13 mbi qafën San Bernardino ose përmes rrugës Lötschenberg-Simplon.

Për shkak të sasisë së madhe të borës që ende është duke u pastruar, në relacionin Realp/UR dhe Hospental/UR përkohësisht nuk ka qarkullim trenash të linjës Matterhorn Gotthard Bahn. Ndërsa për një kohë të pacaktuar është ndërprerë edhe ngarkimi i automjeteve në linjën Oberalppass.