I vërtetohet dënimi “shëruesit nga Berna”: 15 vjet burg

në cilësinë e një “shëruesi” të pakualifikuar, në mes të vitit 2001 dhe 2005 ka infektuar 16 persona në mënyrë të qëllimshme me HIV

Gjykata Federale e Zvicrës i ka vërtetuar dënimin me 15 vjet heqje lirie personit të njohur si “shëruesi nga Berna”, duke hedhur poshtë ankesën e të dënuarit.

Sipas vendimit përfundimtar të Gjykatës më të lartë të Zvicrës, personi i përmendur është dënuar me të drejtë dhe në mënyrë proporcionale me veprën e kryer, nga Gjykata e Lartë e Bernës. Vepra penale për të cilën ai pati marrë dënimin ka qenë shkaktim i lëndimeve të rënda trupore.

Kështu, vendimi për 15 vjet heqje lirie mbetet i pacenuar. Por, Gjykata e Lartë e Bernës duhet sërish të vendosë lidhur lartësinë e shumës që i dënuari duhet të paguajë në emër të dëmshpërblimit, njofton srf. Në këtë pikë, gjyqtarët federalë nuk janë të kënaqur me vendimin e mëhershëm të Gjykatës së Bernës, transmeton albinfo.ch.

Procesi gjyqësor i zhvilluar kundër tashmë të dënuarit ka konstatuar se ai, në cilësinë e një “shëruesi” të pakualifikuar, në mes të vitit 2001 dhe 2005 ka infektuar 16 persona në mënyrë të qëllimshme me HIV.