SVP, kritika qeverisë për “devijimin” e iniciativës

Po kalon viti i dytë nga votimi popullor i Iniciativës për Migracionin Masiv, të sponsorizuar nga SVP/UDC dhe vazhdojnë kundërthëniet lidhur me jetësimin e saj.

Nisur nga kjo, SVP ka shprehur në vazhdimësi kritika për mënyrën se si Këshilli Federal (qeveria e vendit) po synon ta vërë në jetë këtë iniciativë. Këtë pakënaqësi e ka shprehur së fundi kjo parti në përgjigjen e saj pas kalimit të afatit të parashikuar për konsultime. Sipas SVP-së, qeveria me propozimet e saj po e shkel vullnetin e shprehur të popullit.

Nga ana tjetër, qeveria planifikon që, duke u mbështetur në tekstin e iniciativës, të vendosë kontingjente për migrantët nga vendet e treta. Por, kur është fjala për vendet e BE-së, këto kontingjente qeveria do t`i vendoste vetëm kur  Brukseli (BE-ja) konstaton se kjo është në përputhje me Marrëveshjen për Lëvizjen e Lirë. Lidhur me këtë pikë, SVP/UDC-ja e kritikon të drejtën e vetos që me këtë rast i njihet BE-së.