Në vitin 2023, Zvicra bëhet me 9 milionë banorë

Statistika më e re llogarit se në periudhën e ardhshme deri në vitin 2023 në Zvicër do të vijnë nga 70 mijë të huaj në vit

Në vitin 2023 Zvicra pritet të ketë 9 milionë banorë, ose një milion më shumë se tash. Këtë numër e parasheh Zyra Federale e Statistikave në bazë të përllogaritjeve të bëra e që përputhen edhe me prognozën e bërë nga Qeveria Federale për vitin e përmendur.
Siç thotë Markus Schwyn nga Zyra Federale e Statistikës, llogaritet se në dhjetë vitet e ardhshme do të ketë një rritje mesatare të popullatës prej 9 për qind në vit. Ndërsa popullata me prejardhje të huaj, e llogaritur ndaras, do të ketë sipas zyrës në fjalë, një rritje prej 21 për qind. Statistika më e re llogarit se në periudhën e ardhshme deri në vitin 2023 në Zvicër do të vijnë nga 70 mijë të huaj në vit, ndërsa në statistikat e mëhershme bëhej fjalë për 22 mijë në vit.
Deri më tash statistikat në Zvicër kanë vlerësuar se shifra prej 9 milionë banorësh nuk do të mbërrihej para vitit 2060.
Më 22 qershor Zyra Federale e Statistikës do të paraqitet me parashikimin e saj për zhvillimin e popullsisë së Zvicrës deri në vitin 2065.