Shumica e zviceranëve pranojnë refugjatët në lagjen e tyre

Keystone

Shumica e popullatës së Zvicrës nuk ka asgjë kundër që në afërsi të vendit ku banojnë të kenë një qendër azili. Siç bën të ditur një sondazh i realizuar nga revista mujore e Zvicrës Frankofone “L`Hebdo”, më shumë se gjysma e 1220 të të anketuarve do ta pranonin një qendër azili në komunën ose në lagjen e tyre.

Madje rreth dy të tretat e qytetarëve të pyetur kanë thënë se do të bashkëpunonin pa problem me një refugjat, bën të ditur srf.ch.

Mirëpo kur vjen puna për të strehuar në shtëpinë e tyre një refugjat këtu qytetarët zviceranë janë më të rezervuar, transmeton albinfo.ch. Vetëm një e pesta e tyre (20%) do ta bënin këtë, ndërsa për strehimin e një familjeje të tërë refugjatësh do të ishin të gatshëm vetëm 10% ose çdo i dhjeti.

Është interesante se në këtë sondazh më të hapur ndaj refugjatëve janë treguar zviceranët e zonës gjermanishtfolëse se sa ata frankofonë.