Avokatja e Popullit e Sllovenisë, dr. Simona Drenik Bavdek, ka takuar gratë shqiptare në Sllovemi, me ç’rast u njoh me problemet me të cilat përballen ato, e që përfshijnë vështirësitë në mësimin e gjuhës, punësimin, njohjen e diplomave dhe aksesin në shërbimet publike.
Avokatja e Popullit theksoi përgjegjësinë e institucioneve për të garantuar mundësi të barabarta.
Sipas njoftimit të publikuar nga institucioni, gratë shqiptare shprehin gatishmëri për të mësuar gjuhën sllovene, për t’u punësuar dhe për të marrë pjesë aktivisht në jetën shoqërore, por përballen me pengesa që vështirësojnë përfshirjen e tyre, transmeton Albinfo.ch.
Një nga çështjet kryesore të ngritura ishte nevoja për kurse cilësore dhe të aksesueshme të gjuhës sllovene, të përshtatura me nivelin gjuhësor dhe rrethanat e jetës së pjesëmarrëseve.
Po ashtu, përfaqësueset evidentuan vështirësitë në procedurat e punësimit dhe njohjen e diplomave të marra jashtë vendit, të cilat ndikojnë në pavarësinë ekonomike të grave.
Gjatë takimit u theksua edhe roli i ndërmjetëseve ndërkulturore dhe i shoqatave shqiptare në lehtësimin e aksesit në shërbimet shëndetësore, arsimore dhe sociale.
Sipas pjesëmarrëseve, nevojitet financim më i qëndrueshëm për këto struktura, ndërsa mbështetja për integrimin ndryshon nga një komunë në tjetrën.
Vëmendje e veçantë iu kushtua grave që përjetojnë dhunë në familje.
Mosnjohja e gjuhës, e të drejtave dhe e institucioneve, si dhe pasiguria lidhur me lejet e qëndrimit, mund t’ua vështirësojnë kërkimin e ndihmës dhe mbrojtjes.
Avokatja e Popullit theksoi se shteti dhe pushteti vendor duhet t’i mbështesin përpjekjet e grave për integrim përmes masave sistematike, të aksesueshme dhe efektive.
Ajo paralajmëroi gjithashtu se stereotipet dhe përgjithësimet për komunitetet kombëtare mund të thellojnë mosbesimin dhe ndjenjën e përjashtimit, në vend që të ndihmojnë në kuptimin e sfidave shoqërore.
Në deklaratën e saj, dr. Simona Drenik Bavdek nënvizoi se dinjiteti dhe të drejtat e njeriut nuk duhet të varen nga punësimi apo kontributi ekonomik i një individi.
Sipas saj, përfshirja e grave shqiptare dhe e të huajve të tjerë në shoqërinë sllovene duhet të jetë ndër përparësitë e politikave shtetërore dhe vendore, jo vetëm për respektimin e të drejtave të njeriut, por edhe në përgjigje të zhvillimeve demografike dhe nevojave të tregut të punës.
Në përfundim të njoftimit, institucioni i Avokatit të Popullit bën të ditur se do të shqyrtojë mundësitë për të kontribuar në përmirësimin e pozitës së grave shqiptare në Slloveni./Albinfo.ch/
