Liderët politikë të Ballkanit Perëndimor dhe përfaqësues të institucioneve evropiane takohen sot në Budva të Malit të Zi, në kuadër të Samitit të Procesit të Berlinit, një nismë që synon forcimin e lidhjeve mes vendeve të rajonit dhe avancimin e rrugës së tyre drejt Bashkimit Evropian, përcjell albinfo.ch.
Kosova në këtë takim përfaqësohet nga kryeministri Albin Kurti, ndërsa pjesëmarrja e drejtuesve të tjerë të rajonit e vendos në fokus të diskutimeve bashkëpunimin politik dhe ekonomik mes vendeve të Ballkanit Perëndimor.
Në Budva pritet të jenë edhe kryeministri i Shqipërisë, Edi Rama, kryeministri i Maqedonisë së Veriut, Hristijan Mickoski, kryetarja e Këshillit të Ministrave të Bosnjë-Hercegovinës, Borjana Krishto, si dhe ushtruesi i detyrës së kryeministrit të Serbisë, Gjuro Macut. Në samit marrin pjesë gjithashtu përfaqësues të lartë të vendeve dhe institucioneve të Bashkimit Evropian.
Procesi i Berlinit, një platformë për afrimin me BE-në
I themeluar në vitin 2014, Procesi i Berlinit është një nismë diplomatike që synon të intensifikojë bashkëpunimin ndërmjet gjashtë vendeve të Ballkanit Perëndimor, të nxisë lidhjet ekonomike dhe të lehtësojë integrimin evropian të rajonit.
Përmes kësaj platforme, vendet pjesëmarrëse synojnë të avancojnë bashkëpunimin në fusha të ndryshme, duke përfshirë ekonominë, transportin, energjinë dhe lëvizjen më të lehtë të qytetarëve e bizneseve.
Integrimi në Bashkimin Evropian mbetet një nga objektivat kryesore të rajonit, megjithëse vendet ndodhen në faza të ndryshme të procesit. Kosova vazhdon të jetë e vetmja nga gjashtë vendet e Ballkanit Perëndimor që nuk ka statusin e vendit kandidat për anëtarësim në BE.
Samiti i Budvës përbën një tjetër mundësi për të diskutuar sfidat e përbashkëta dhe për të forcuar koordinimin mes vendeve të rajonit dhe partnerëve evropianë./Albinfo.ch
