Afër 300 të vdekur gjatë korrikut, si pasojë e vapës

Ndërkaq vera e vitit 2003 e cila njihet si verë me vapë rekorde në Zvicër, kishte marrë jetën e 975 personave më shumë se në verat e zakonshme

Vapa e madhe që ka mbretëruar gjatë korrikut në Zvicër ka marrë tagrin e vet: Afër 300 persona kanë vdekur si pasojë e drejtpërdrejtë e kësaj, njofton Zyra Federale e Statistikave (BFS).
Madje vetëm në dy javët e para të korrikut, numri i të vdekurve të moshës mbi 65 vjeçare në Zvicër ka qenë 2234, që është 12 deri 15 për qind më shumë se mesatarja e një periudhe të tillë në vitet “normale”.
Së paku 267 raste të vdekjes sipas BFS kanë ardhur si pasojë e temperaturave të larta Ndërsa gjatë dy javëve të para të korrikut, kur vapa ka qenë më e madhe, vdekshmëria e personave mbi 65 vjeçarë kishte kaluar në mënyrë të theksuar mesataren.
Ende nuk ka të dhëna lidhur me vdekshmërinë e shkaktuar nga vapa gjatë 12 ditëve të para të gushtit.
Vera e vitit 2003 e cila njihet si verë me vapë rekorde në Zvicër, kishte marrë jetën e 975 personave më shumë se në verat e zakonshme.