Aksionet zvicerane bien pas paralajmërimit për tarifa të reja nga SHBA

Tregu zviceran i aksioneve ka nisur javën me rënie, pas lajmit se Shtetet e Bashkuara do të vendosin tarifa shtesë prej 30 përqind për mallrat e Bashkimit Evropian, duke filluar nga 1 gushti, shkruan SRF, transmeton albinfo.ch.

Indeksi kryesor SMI (Swiss Market Index) ra menjëherë pas hapjes me 0.41 përqind, duke zbritur në 11,888 pikë. Kjo lëvizje reflekton shqetësimet e investitorëve për ndikimin e mundshëm ekonomik që mund të kenë masat proteksioniste amerikane ndaj tregtisë ndërkombëtare.

Ekspertët vlerësojnë se Zvicra, megjithëse nuk është pjesë e BE-së, mund të preket indirekt përmes lidhjeve të ngushta ekonomike me vendet anëtare dhe përmes zinxhirëve ndërkombëtarë të furnizimit.

Tarifat mund të ndikojnë në kompanitë eksportuese, veçanërisht ato që operojnë në sektorët e teknologjisë, industrisë farmaceutike dhe prodhimit të makinerive, transmeton albinfo.ch.