Ambasada Zvicerane: Ndikimi i pandemisë në biznes, shqetësues

(KEYSTONE/DPA/Martin Gerten)

Ambasada e Zvicrës në Shqipëri, përmes një publikimi në rrjetet sociale ka bërë të ditur rezultatet paraprake të një ankete që po zhvillohet me bizneset, pasi një pjesë e bizneseve të vogla dhe të mesme në Shqipëri janë të shqetësuara për ndikimin që do të ketë situata e krijuar nga pandemia në aktivitetin e tyre.

Sipas rezultateve të deritanishme, 73% e bizneseve thonë se kjo situatë do të ndikojë negativisht, për vetëm 1% të bizneseve situata e pandemisë nuk ka ndikuar në shërbimet e tyre, ndërsa 43% të kompanive në Shqipëri po vazhdojnë aktivitetin e tyre pjesërisht.

Ky anketim, i zhvilluar nga Këshilli i Investimeve Shqipëri dhe i financuar nga Sekretariati Zviceran i Shtetit për Çështje Ekonomike SECO, ka si qëllim mbledhjen e evidencave në lidhje me efektet e mundshme të pandemisë COVID-19 në klimën e biznesit shqiptar dhe minimizimin e efekteve negative.

Afati për plotësimin e këtij pyetësori është deri më 3 maj, rezultatet e tij do t’i paraqiten qeverisë shqiptare, shkruajnë mediat shqiptare, përcjell albinfo.ch.