Athinë: Shqiptari godet me thikë infermieren, më pas hidhet nga kati i 4-t i spitalit

Një 59-vjeçar shqiptar goditi me thikë një infermiere dhe në vazhdim u hodh nga kati i 4-t i spitalit, duke gjetur vdekjen në vend.

Ngjarja ndodhi mëngjesin e së hënës. Policia greke tha se viktima quhet Petro Çako, 59-vjeç.

Ai ishte i shtruar në spitalin e Athinës për probleme që nuk kanë lidhje me Covid, por dyshohet se ka pasur probleme psikike, shkruajnë mediat atje, përcjell albinfo.ch.

Autoritet kanë sekuestruar kartelën e tij mjekësore dhe po hetojnë për shkaqet e tragjedisë, raporton t.ch.

Infermieria e plagosur deklaroi se kishte shkuar në dhomën që mbahej pacienti Çako, pasi kishte dëgjuar alarmin për ndihmë nga dhoma e tij.

Pasi mbërriti në dhomë, kuptoi se pacienti ishte fshehur mbas portës dhe në moment ka dalë duke e goditur me një thikë kuzhine e duke e plagosur në shpinë. Ajo ndodhet jashtë rrezikut për jetën.