Basha: Masakra e Matit frymëzohet nga krimi qeveritar

Kryetari i Partisë Demokratike, Lulzim Basha, ishte mbrëmë tek familjet e 3 viktimave e Matit  për tu shprehur ngushëllimet për humbjen e njerëzve të tyre të dashur. Basha gjithashtu vizitoi edhe të plagosurin Astrit Hani, i cili ndodhet në spitalin e Burrrelit.

Basha tha se masakra e djeshme është e frymëzuar nga krimi në pushtet.

“Ngjarja e djeshme ka tronditur jo vetëm Burrelin por gjithë shqiptarët, ajo tregon kapitullimin total të shtetit përballë krimit dhe gjendjen e pasigurisë që mbretëron nga Shëllia në qendër të Tiranës, nga Shkodra  në Vlorë. Modeli nga të cilat frymëzohen këto ngjarje kriminale ku 5 njerëz kanë humbur jetën brenda 24 orëve është ai që duhet të marrë fund dhe të zëvendësohet nga një qeverisje e përkushtuar, një qeverisje e cila kujdeset për sigurinë e qytetarëve dhe është pranë tyre në ditë të vështira”, ka thënë ai.

Basha theksoi se PD-ja dhe opozita e bashkuar me ardhjen në pushtet do të rikthejnë sigurinë në vend, duke rivendosur me dorë të hekurt forcën e ligjit.