BE do të ndalojë qeset plastike!

Në shënjestër të sulmit janë sidomos qeset prej plastike të tejdukshme, ato që në arkat e shitoreve jepen falas

Qeset plastike, këto gjësende pa të cilat nuk mund ta paramendojmë përditshmërinë tonë (së paku sa u përket pazareve…) mund t`i takojnë shumë shpejt të kaluarës! Natyrisht, kështu mund të ndodhë nëse pyetet Komisioni i BE-së, i cili kërko që në marketet e vendeve evropiane të mos shërbehen më qese të tilla.

Në shënjestër të sulmit janë sidomos qeset prej plastike të tejdukshme, ato që në arkat e shitoreve na jepen (ende)me aq përzemërsi falas, për t`i mbushur me fruta, perime e të ngjashme.  

Sipas propozimit të komisarit të BE-së për ambient,  28 shtetet anëtare do të duhet që qeset në fjalë t`i ngarkojnë me taksa ose, që sipas tyre është më mirë akoma, t`i ndalojnë përfundimisht. Me masat e propozuara, komisioni i ka vënë vetes për synim reduktimin e qeseve plastike në BE për 80 për qind. Por, që kjo të zbatohet edhe në praktikë, nevojitet së pari pëlqimi nga Parlamenti i BE-së.