BE pret rritje të numrit të refugjatëve në të ardhmen

Frederic Köberl @internetztube

Autoritetet e BE-së presin rritje të numrit të refugjatëve në Bashkimin Evropian, pa llogaritur këtu njerëzit që janë larguar nga lufta në Ukrainë, përcjell albinfo.ch.

“Është shumë e qartë që në një kohë të afërt shifrat e kërkesave për azil do të rriten”, ka bërë prognozën drejtoresha e Zyrës së BE-së për Azilin, EUAA, Nina Gregori.

Mungesa e stabilitetit dhe kërcënimi i sigurisë njerëzore janë tipare të botës së sotme. “Për fat të keq, nuk janë provizore”, ka thënë Gregori për grupin mediatik gjerman, Funke Mediengruppe.

Zhvillimet gjeopolitike në vitet 2021 dhe 2022 kanë pasur ndikim të drejtpërdrejtë në nevojën për mbrojtje dhe kanë çuar në fluks drejt BE-së.

Nga janari deri në tetor të këtij viti në BE janë regjistruar 790.000 kërkesa për azil, ka raportuar Gregori.

Kjo shënon një rritje me 54% në krahasim me të njëjtën periudhë të vitit të kaluar. Shumica e kërkesave për azil vijnë nga Siria, Afganistani dhe Turqia. Italia ashpërson politikën ndaj refugjatëve.

Tek shifrat e reja nuk janë regjistruar refugjatët e luftës nga Ukraina. Ata kanë mundësi, pa ndonjë procedurë të komplikuar azili që të marrin mbrojtje të përkohshme në BE.