Buxheti mesatar familjar, 6750 franga

Shpenzimet më të mëdha, 1475 franga në muaj, familjet i bëjnë për banim dhe energji elektrike

Të ardhurat mujore për ekonomitë familjare të Zvicrës janë shtuar në krahasim me pak vite më parë. Kështu, nëse në vitin 2006 fitimi mesatar mujor për një familje ishte 6100 franga, pesë vite më vonë, në vitin 2011 ky fitim është ngritur në 6750 ose për 640 franga më i lartë.

Shpenzimet më të mëdha, 1475 franga në muaj, familjet i bëjnë për banim dhe energji elektrike, tregon studimi për buxhetimin e ekonomive familjare i realizuar nga Enti Federal i Statistikave (BFS) që i referohet vitit 2011.

Të ardhurat nga punësimi, që janë mesatarisht 7270 franga në muaj, përbëjnë kontribuesin më të madh të buxhetit familjar, ose 75 për qind të të ardhurave bruto. Burimi i dytë i të ardhurave të zviceranëve është pensioni dhe ndihma sociale, që përbëjnë 19 për qind. Ndërsa të ardhurat nga pasuria e deponuar, për shumicën e madhe të familjeve ka rol margjinal. Vetëm çdo e shtata familje merr më shumë se 5 për qind të të ardhurave bruto nga ky burim, shkruan sfr.ch.

Dërgesat nga burimet tjera si për shembull alimentacionet përbëjnë vetëm 1.4 për qind të të ardhurave bruto të ekonomive familjare të Zvicrës.