Çdo i katërti qytetar i Cyrihut, milioner

Me këtë dendësi milionerësh (27.34%), Cyrihut ia kalon vetëm Monakoja, me 29.21%. Pastaj vjen Gjeneva me 17.92, Nju Jorku me 4.63 etj.

Çdo i katërti qytetar i qytetit të Cyrihut ka pasuri prej së paku një milion frangash. Në fakt përqindja e milionerëve në metropolin bankar të Zvicrës e më gjerë është pak më e lartë, gjegjësisht 27.34%. Me këtë dendësi milionerësh, Cyrihut ia kalon vetëm Monakoja, me  29.21%, e cila është shtet-qytet.

Revista britanike për ekonomi “Economist” e karakterizon Cyrihun si qoshen më të shtrenjtë të botës. Ndërsa sipas studimit të bërë nga magazina amerikane “Spear`s” në bashkëpunim me bankën e të dhënave të njerëzve të pasur WealthInsight, pas Monakos dhe Cyrihut, dendësia e milionerëve në qytetet tjera të botës duket mjaft modeste. Vetëm në Gjeneve, me 17.92 për qind, milionerët kanë një pozitë të mirë, ndërsa kjo nuk mund të thuhet për “kolegët” e tyre në Nju Jork (4.63% ose në Londër (3.39%), qytete këto që zënë vendin e katërt gjegjësisht të gjashtë në ranglistë.

Ndërsa Londra zë vendin e parë me numrin e gjithëmbarshëm të milionerëve (281 mijë), që nuk është ndonjë shifër kur dihet se metropoli anglez ka numër banorësh të krahasueshëm me atë të gjithë Zvicrës.

Si kriter për tu quajtur milioner, autorët e studimit kanë vendosur pasurinë neto të një personi, që bën një milion dollarë ose më shumë. Shtëpitë ose banesat këtu nuk janë llogaritur.

Afërsia me bankat në qendrat e njohura bankare si Cyrihu dhe Gjeneva ka qenë përcaktuese për numrin madh të milionereve në këto dy qytete.