Coop reagon: Posteri që “ofron” banesa të lira, nuk është yni, është fals

Postera dhe letra në emër të "Coop Wohngenossenschaft" po qarkullojnë në qytetin e Cyrihut. Coop distancohet nga reklamat e rreme

E gjitha tingëllon si një dhuratë dorëlirë për Krishtlindje: Strehim të përballueshëm në mes të qytetit të Cyrihut, transmeton albinfo.ch. Një poster që tregon një vajzë të vogël të ulur nën bredhin e Krishtlindjes lexon: “Për ata që kërkojnë një apartament. 1000 apartamente të reja të kooperativës (të subvencionuara) në faqen Swissmill”. Logoja e Coop mund të shihet poshtë djathtas, në poster.

Coop distancohet nga posteri, siç ka raportuar fillimisht ZüriToday. Shitësi me pakicë shkroi në Twitter: “Dërguesi dhe faqja e internetit nuk janë të lidhura me kooperativën Coop”.

Ndërsa sipas NZZ, “shakaja komplekse dhe e kushtueshme” mund të ketë pasoja ligjore për autorët e posterave të rreme. Po ashtu Coop ka njoftuar se do të ngrejë kallëzim penal ndaj personave të panjohur.

Një “grup i qytetarëve të shqetësuar” mund të qëndrojë pas aksionit, mund të lexohej të premten në nzz.ch. Një person anonim ka thënë për gazetën se arsyeja e fushatës reklamuese ishte mungesa akute e banesave në qytetin e Cyrihut, përcjell albinfo.ch. Coop mund të luajë një rol të rëndësishëm në krijimin e banesave të përballueshme.

Dy vjet më parë, Coop kishte larguar 25 banorë të dy pronave pranë rrokaqiellit Swissmill Tower. Banesat e tyre do t`u linin hapësirë ndërtimit të godinave për zyra. Pavarësisht nga pasojat politike, Coop u ka qëndruar  planeve. Sipas NZZ, rinovimi është duke u zhvilluar.

---