Duka në Preshevë për turneun e futbollit, shfaqet baneri kundër EURO 2027 me Serbinë

Të rinjtë shqiptarë të Luginës së Preshevës janë mbledhur në një turne futbolli, i cili është përkrahur nga Federata Shqiptare e Futbollit (FSHF). Turneu ka tërhequr vëmendjen e shumë entuziastëve të sportit dhe ka përfshirë një pjesëmarrje aktive të rinisë nga gjithë ky rajon, raporton albinfo.ch.

Në këtë ngjarje të rëndësishme për futbollin në Luginën e Preshevës ka udhëtuar gjithashtu presidenti i FSHF-së, Armand Duka, i cili të hënën zhvilloi takime me drejtuesit e komunës së Bujanocit dhe të Preshevës. Këto takime kishin për qëllim forcimin e bashkëpunimit dhe zhvillimin e futbollit në këtë rajon, duke nënvizuar rëndësinë e angazhimit të FSHF-së për rritjen e nivelit të sporteve dhe mundësive për të rinjtë shqiptarë.

Megjithatë, gjatë zhvillimit të turneut, në vendin e ngjarjes janë shfaqur edhe anëtarë të grupit të tifozëve “Kuq e Zi”, të cilët zhvilluan një tjetër protestë kundër organizimit të Euro 2027 të futbollit nën organizimin e përbashkët të Shqipërisë dhe Serbisë. Ata shpalosën një baner me mbishkrimin “Jo bashkë me shtetin që na mohon. Jo Euro 2027 me Serbinë”, duke shprehur kundërshtimin e tyre ndaj këtij projekti të përbashkët, raporton albinfo.ch.