Fushatë dhe kundërfushatë për vinjetat

Komiteti i partive të djathta “Po për vinjetën” ka arsyetuar ngritjen e çmimit të vinjetës nga 40 në 100 franga me nevojën për mirëmbajtjen e rrugëve

Ndonëse për çmimin e vinjetës së autostradave populli në Zvicër do të votojë në muajin nëntor, fushata ka filluar që tash. Kështu, të martën, kundërshtarët e ngritjes së çmimit i kanë dorëzuar nënshkrimet e nevojshme për referendum ndërsa të premten, mbështetësit e ngritjes së çmimit kanë prezantuar argumentet e tyre për opinionin.

Kështu, komiteti i partive të djathta “Po për vinjetën” ka arsyetuar ngritjen e çmimit të vinjetës nga 40 në 100 franga. Vetëm në këtë mënyrë qeveria mund të sigurojë mjetet e nevojshme për të mirëmbajtur 400 kilometra rrugë, të cilat i merr për mirëmbajtje nga kantonet. Prandaj, kush thotë Jo për ngritjen e çmimit të vinjetës, ai thotë jo edhe për rrugët e mira dhe të sigurta nacionale.

Komitetin e referendumit kundër ngritjes së çmimit e udhëheqin përfaqësues nga SVP dhe në të marrin pjesë edhe politikanë nga BDP dhe CVP. Ndërsa në komitetin Pro ngritjes së çmimit të vinjetës qëndrojnë përfaqësues nga FDP dhe SVP. Këta tërheqin vërejtjen se çmimi i vinjetës së autostradave për herë të fundit është ngritur në vitin 1995. Po ashtu sipas tyre, një ngritje prej 60 frangash është sa një mbushje rezervuari me karburant për tërë vitin. Ngasja e automobilave në Zvicër është më e lirë se në vendet tjera, thonë në komitetin pro ngritjes së çmimit.