Gjenden kufomat e katër personave, dyshohet për dramë familjare

Në një terren malor në Kantonin Neuchatel janë gjetur sot kufomat e katër personave: një burrë, një grua dhe dy fëmijë të vegjël. Dyshohet se kemi të bëjmë me një dramë të rëndë familjare, thotë policia e kantonit, edhe pse ende nuk dihet me siguri lidhja në mes të personave të vdekur.

Në afërsi tëmalit Creux-du-Van janë gjetur kufomat e një burri dhe të dy fëmijëve të vegjël ndërsa disa qindra metra më tutje, edhe kufoma e një gruaje.

Sipas hulumtimeve që ka bërë gazeta regjionale franceze “L`Est Republicain”, babai dhe dy fëmijët ishin nga Pontalier ndërsa gruaja e vrarë nuk është bashkëshortja e burrit në fjalë.

Ndërkaq, e ëma e fëmijëve të vrarë nuk është gjetur ende. Kërkimi i saj ka filluar të premten në mëngjes pas thirrjes së një burri në polici.

Ai kishte shprehur shqetësimin e tij sepse një familjar i tij kishte marrë një informatë sipas të cilës babai, me qëllime jo të mira, i shoqëruar nga dy fëmijët kishte marrë rrugën për në Creux du Van.