Hekurudhat kompensojnë udhëtarët për vonesat e trenave

Shfrytëzuesit e transportit hekurudhor të Zvicrës, të cilët për shkak të parregullsive eventuale të Ndërmarrjes Federale të Hekurudhave (SBB/CFF) kanë pësuar vonesa të gjata, duhet të kompensohen urgjentisht. Zyra Federale për Komunikacion ka dërguar sot për shqyrtim projektin që merret me këtë problematikë.

Ky projekt do të duhej të rregullonte çështjen e të drejtave të udhëtarëve njësoj siç është e rregulluar kjo tash në BE. Sipas kësaj, ndërmarrje hekurudhore obligohet që të paguajë kompensimin për të gjithë udhëtarët në rastet kur treni vonohet më shumë se një orë.

Lartësia e shumës së kompensimit pritet të rregullohet më vonë. Por ajo duhet të jetë gjithsesi më e lartë se shuma që aktualisht disa ndërmarrje hekurudhore paguajnë në bazë vullnetare në rastet e ngjashme.