Hidhet poshtë mocioni për “Pushim të lindjes” për etërit

Qeveria është duke shqyrtuar një zgjidhje sipas të cilës prindërit pas lindjes së fëmijës së tyre mund ta reduktojnë vëllimin e punës për 20 për qind

Dhoma Nacionale e Parlamentit të Zvicrës ka hedhur poshtë sot një mocion për pushimin e lindjes për baballarët, që e kishte ngritur deputetja Valerie Piller-Carrard. Kundër këtij mocioni kanë votuar 96 deputetë ndërsa për të, 84 sish.

Është interesante se 13 deputetë  të CVP/ PDC, e njohur si “parti e familjes”, kanë votuar kundër ndërsa 5 të tjerë të përmbajtur. Ky bilanc tregon se është pikërisht në dorën e kësaj partie që të lejojë ose jo pushimin e lindjes edhe për burrat, gratë e të cilëve kanë lindur.

Edhe Këshilli Federal (qeveria) është shprehur në vazhdimësi kundër një pushimi të tillë. Sipas tij kjo është rruga  e gabuar për një zgjidhje në drejtimin e duhur, pasi që mocioni i referohet pushimit në një kohë të shkurtë pas lindjes së fëmijës. Ndërsa në të kundërt, qeveria është duke shqyrtuar një zgjidhje sipas të cilës prindërit pas lindjes së fëmijës së tyre të fitojnë të drejtën që ta reduktojnë vëllimin e punës për 20 për qind.

Nga një zgjidhje e tillë qysh tash përfitojnë të punësuarit e institucioneve federale. Për këtë arsye qeveria ka angazhuar të mërkurën departamentin e brendshëm që të shqyrtojë deri në mesin e vitit 2014 një zgjidhje të tillë.