Hotelet dhe resoret luksoze të Golemit, të mbushura me turistë kosovarë

Golemi, me një gamë të gjerë hotelesh dhe resoresh luksoze turistike, duke përfshirë edhe shërbimin all-inclusive

Tashmë zona e Golemit është njëra nga destinimet kryesore për pushime, me plazhin e gjatë, ku janë ngritur shumë objekte turistike, hoteliere, shtëpi pushimi, transmeton albinfo.ch.

Ky fshat në 25 vjetët e fundit ka përjetuar zhvillim shumë të shpejtë urban.

Me një gamë të gjerë hotelesh dhe resoresh luksoze turistike, duke përfshirë edhe shërbimin all-inclusive, plazhi i Golemit, i dyti për nga madhësia, pas plazhit të Durrësit, preferohet çdo ditë e më shumë nga turistë elitarë kosovarë dhe të huaj.

Strukturat e reja akomoduese, shërbimi cilësor si dhe çmimet konkurruese në krahasim me disa nga vendet e rajonit, po e bëjnë këtë bregdet mjaft tërheqës. Prenotimet e para nga turistët e huaj, kryesisht polakë dhe çekë, kanë nisur, ndërsa fundjavat mbipopullohen nga pushuesit vendas dhe trevat shqipfolëse.

Plazhi me një gjatësi prej 5 kilometrashj, me rërë e ujë të pastër, që gërshetohet me natyrën nga pylli me pisha dhe kaltërsia e detit Adriatik, vizitohet nga qindra mijëra pushues dhe preferohet në çdo stinë të vitit. /Albinfo.ch

---