Identiteti elektronik shtetëror në Zvicër: Fillon fushata pro ligjit të ri, votimi më 28 shtator

Keystone

Një aleancë e gjerë parlamentare në Zvicër ka nisur fushatën në mbështetje të ligjit të ri për identitetin elektronik (e-ID), i cili do t’i nënshtrohet votimit popullor më 28 shtator 2025. Projektligji parashikon krijimin e një identiteti dixhital tërësisht në pronësi dhe nën administrimin e shtetit, pas refuzimit të një versioni të mëparshëm privat në vitin 2021.

Sipas mbështetësve të tij, ky sistem i ri do të ofrojë një infrastrukturë të sigurt dhe moderne, duke mundësuar përdorim të thjeshtë dhe universal për shërbime qeveritare. Të dhënat do të ruhen në mënyrë të decentralizuar në pajisjet mobile të përdoruesve dhe jo në një bazë të dhënash qendrore shtetërore. Përdorimi i e-ID-së do të jetë falas dhe vullnetar.

Zyrtarë nga të gjitha partitë politike kanë theksuar rëndësinë kombëtare të projektit dhe përfitimet për qytetarët, bizneset dhe administratën publike si përmirësimi i proceseve dixhitale, reduktimi i burokracisë dhe forcimi i konkurrencës, transmeton albinfo.ch.

Megjithatë, disa parti dhe grupe kundërshtare, përfshirë UDF-në, të rinjtë e UDC-së, Miqtë e Kushtetutës dhe grupe të tjera, kanë ngritur shqetësime për mbikëqyrje dixhitale dhe ndikimin e korporatave private në infrastrukturën teknologjike, duke theksuar se kontrolli shtetëror mund të jetë i rremë.

Komiteti kundër ligjit ka dorëzuar mbi 60 000 firma për të kërkuar referendum, çka tregon ndasi të qarta brenda opinionit publik.