Kafetë më të shtrenjta pihen në Cyrih

Një studim i ri nga “Cafetier Suisse” tregon dallimet e larta të çmimeve nëpër kantone për një “cafe kreme”, siç quhet në Zvicër

“Cafetier Suisse” për të 26 herë me radhë ka realizuar një anketë për  çmimin e kafeve. Një filxhan “Cafe Crème” kushton mesatarisht 4.13 franga, dy centë më shumë se vitin e kaluar.

Anketa është realizuar me 350 kafene në pjesën gjermanofolëse të Zvicrës dhe asaj frankofone të kantonit të Bernës.

Kafetë më të lira janë në Kantonin e Bernës. Një filxhan kafe kushton mesatarisht 3.90 franga, në një varg çmimesh prej 3.20 deri 4.50. Asnjë rajon tjetër, sipas studimit, nuk është nën kufirin e katër frangave.

Kafetë më të shtrenjta pihen në Cyrih. 4.36 franga kushton një kafe. Vargu  i çmimeve shkon nga 3.80 deri në 5.50 franga. Shumica e kompanive (80.17 për qind) nuk ka ndryshuar çmimet në krahasim me vitin 2012.

Për vitin e ardhshëm “Cafetier Suisse” nuk ka lajme të mira për konsumatorin, edhe pse çmimi i kafesë në tregun botëror ka shënuar rënie. Shoqata pret një rritje të çmimeve për një “kafe crème”.