Kapen 54 shitës droge, mes tyre edhe kosovarë dhe serbë

Janë shitur rreth 34 kg marihuanë. Në mesin e 54 shitësve ka pasur edhe fëmijë 13 vjeçarë

Policia e Lucernit ka hetuar dhe denoncuar 54 persona që kanë shitur  dhe 95 që kanë konsumuar drogë në regjionin Hochdorf.  Në mesin e tyre ka shtetas zviceranë, kosovarë, serbë, sirianë dhe portugezë.

Sipas organeve ndjekëse këta persona në periudhën 2009-2012 kanë shitur 34 kilogramë marihuanë. Vlera në treg e kësaj sasie droge llogaritet rreth 323.000 franga.

Në mesin e shitësve dhe konsumuesve të drogës ka pasur edhe fëmijë 13 vjeçarë. Personat e përfshirë në këtë rrjet janë nga mosha 13 deri në 32 vjeçare.

Përveç marihuanës, shitësit e drogës në regjionin Hochdorf dhe Emmenbrücke  kanë tregtuar edhe hashash, kokainë dhe amfetaminë.

Policia kishte filluar hetimet intensive ndaj këtij rrjeti që nga maji i vitit të kaluar. Ajo kishte bërë 12 bastisje shtëpish dhe kishte marrë në pyetje gjithsej 151 persona.