Koncerti Zvicerano-Kosovar bashkon diplomacinë, kulturën dhe miqësinë në SHBA

Një mbrëmje e veçantë në kuadër të 250-vjetorit të Pavarësisë së SHBA-së solli së bashku diplomatë, artistë dhe përfaqësues të komuniteteve përmes muzikës dhe vlerave të përbashkëta

Në një atmosferë të mbushur me muzikë, miqësi dhe partneritet, u mbajt Koncerti Zvicerano-Kosovar në Shtetet e Bashkuara të Amerikës, i organizuar në kuadër të shënimit të 250-vjetorit të Pavarësisë së SHBA-së, transmeton albinfo.ch.

Ambasada e Republikës së Kosovës në SHBA, në bashkëpunim me Ambasadën e Zvicrës, mirëpriti përfaqësues nga administrata amerikane, Kongresi, bota akademike, arti, shoqëria civile dhe komunitetet shqiptare e ndërkombëtare, në një mbrëmje që vuri në pah fuqinë bashkuese të kulturës.

Një falënderim i veçantë iu drejtua Ambasadorit Dr. Ralf Heckner, bashkëshortes së tij Dr. Ilaria Macconi Heckner dhe Ambasadës së Zvicrës për mikpritjen dhe bashkëpunimin në organizimin e aktivitetit të mbajtur në rezidencën e tyre.

Pika kulmore e mbrëmjes ishte interpretimi artistik i duos me famë ndërkombëtare ARIADITA, të përbërë nga pianistet Ardita Statovci dhe Ariane Haering. Përmes interpretimit të veprave nga Mozart, Smetana, Honegger, Aliçkaj, Beach dhe Poulenc, ato sollën një atmosferë të veçantë artistike, duke reflektuar miqësinë dhe lidhjet ndërmjet Kosovës dhe Zvicrës.

Në fjalën e tij, ambasadori i Kosovës në SHBA, Ilir Dugolli, theksoi se Zvicra dhe Shtetet e Bashkuara kanë luajtur një rol të rëndësishëm në rrugëtimin e Kosovës dhe vazhdojnë të mbeten ndër partnerët dhe miqtë më të afërt të vendit.

Mbrëmja u shndërrua jo vetëm në një festë të kulturës dhe muzikës, por edhe në një shprehje mirënjohjeje për mbështetjen dhe miqësinë e vazhdueshme ndërmjet Kosovës, Zvicrës dhe Shteteve të Bashkuara./Albinfo.ch

---