Kosovë: Presidenca kundërshton propozimin për rritjen e çmimit të energjisë elektrike

Foto FB: Presidenca e Republikës së Kosovës

Presidenca e Republikës së Kosovës ka reaguar me shqetësim ndaj propozimit për rritjen e çmimit të energjisë elektrike, duke e konsideruar atë në kundërshtim me kornizën ligjore dhe me interesin e qytetarëve në kushtet aktuale ekonomike, përcjell albinfo.ch.

Sipas një dokumenti zyrtar drejtuar Zyrës së Rregullatorit për Energji (ZRrE), Presidenca thekson se një rritje e tillë, që parashihet të jetë mesatarisht 15% për konsumatorët, do të rëndonte buxhetin e qytetarëve dhe do të rrezikonte rritjen e mëtejshme të inflacionit. Sipas të dhënave, kjo do të çonte në një rritje kumulative të tarifës për konsumatorët prej 125% që nga viti 2021.

Presidenca argumenton se vendimi nuk mund të merret i shkëputur nga konteksti zhvillimor dhe socio-ekonomik i vendit. Ajo kritikon mungesën e transparencës në raportimet financiare të operatorëve energjetikë dhe vë në pah dështimet e KEK-ut në realizimin e planit të prodhimit, gjë që ka ndikuar në rritjen e kostos së importit të energjisë.

Për të shmangur pasojat e rënda që një vendim i tillë mund të ketë për qytetarët dhe ekonominë, Presidenca propozon një sërë masash alternative, përfshirë:

• mirëmenaxhimin e shpenzimeve dhe reduktimin e humbjeve në rrjet;

• subvencionimin e energjisë për shtresat më të prekura;

• aplikimin e përkohshëm të TVSH-së më të ulët ose largimin e saj;

• masa për detyrimin e pagesave në komunat veriore;

• dhe programin e pagesës me këste për faturat.

Po ashtu, theksohet nevoja për investime afatgjata në kapacitete të reja prodhuese dhe burime të qëndrueshme energjetike, përfshirë energjinë alternative dhe marrëveshjet ndërkufitare me shtetet aleate.

Presidenca i bën thirrje ZRrE-së që të marrë parasysh komentet e saj dhe të qytetarëve, para se të merret ndonjë vendim përfundimtar për çmimet e energjisë elektrike.