KPM miraton ndryshimet në rregullore, zgjedh kryetarin e ri pa i skaduar mandati kryetarit aktual

Foto FB: Komisioni i Pavarur i Mediave - KPM

Komisioni i Pavarur i Mediave në mbledhjen e sotme ka miratuar plotësim/ndryshimin e rregullores së brendshme, e që përfshin zgjedhjen e kryetarit dhe nënkryetarit të ri, para skadimit të mandatit të kryetarit aktual.

Tashmë ish-kryetari i KPM-së, Jeton Mehmeti, deklaroi se ndryshimi i rregullores kërkon diskutim publik, por që kjo u kundërshtua nga anëtarët, të cilët deklaruan se kjo është çështje e brendshme dhe se nuk ka arsye për diskutim.

“Unë nuk jam dakord me asnjërën prej tyre. Ndryshimi i rregullores kërkon diskutim publik… duhet të respektohet ky nen i ligjit të KPM-së. Nuk pajtohem edhe me të dytën…. zgjedhja e Kryetarit duhet të bëhet në seancën vijuese dhe argumenti se mund te mbetemi pa kryetari nënkupton se anëtari më i vjetër është përfaqësues i KPM-së. Kjo deri në konstitutimin e një organi të ri anëtarëve të rinj dhe sikur ishte më herët kur të vijnë anëtarët e ri dhe siç thotë rregullorja me 2/3 zgjidhet nënkryetari dhe Kryetari i ri”, ka thënë ai.

Tutje, ai deklaroi se “ai asnjëherë nuk i ka ikur përgjegjësisë, jemi në mbledhjen e rregullt, dhe ky nuk është institucion që unë e marrë me veti”.

Pro ndryshimit të rregullores votuan tre anëtarë dhe pas ndryshimit të rregullores, anëtarët votuan  për zgjedhjen e kryetarit të ri, ku me katër vota për u zgjedh Besnik Berisha, transmeton albinfo.ch.

Flutura Kusari, juriste e të drejtës së medias ka deklaruar se ky është sulm politik ndaj pavarësisë së Komisionit të Pavarur për Media dhe është bërë për të ushtruar presion në televizione.

“Kapja politike e KPM-së u kompletua. Rregullorja e re u ndryshua kundërligjshëm. Jeton Mehmeti u shkarkua De Facto nga pozita e kryetarit të KPM-së. KPM tash ka kryetar jolegjitim. Ky është sulm politik ndaj pavarësisë së Komisionit të Pavarur për Media dhe është bërë për të ushtruar presion në televizione”, ka shkruar ajo.