Kryeministri i Shqipërisë akuzohet se po nxit vëllavrasjen

Kreu i partisë më të madhe opozitare në Shqipëri, Lulzim Basha, ka akuzuar kreun e ekzekutivit të Shqipërisë, Edi Rama, duke thënë se ai po nxit vëllavrasjen.

Sipas Bashës, kryeministri Rama po kërkon të nxisë dhunë masive në Shqipëri dhe po kërkon të nxisë luftë mes militantëve të ndryshëm politikë.

“Protestat tona tani janë protesta të mëdha popullore, protesta të njerëzve që nuk pajtohen më me krimin dhe korrupsionin që po shkatërron jetët e njerëzve. Kjo e ka trembur dhe e ka futur në panik Edi Ramën. Prandaj, tani ai ka vendosur të zbatojë një plan të rrezikshëm, për nxitjen e ndarjeve dhe përplasjeve sociale në Shqipëri”, deklaroi ai.

Përplasjet pozitë-opozitë po vazhdojnë, pasi opozita përkrah vendimin e Presidentit Meta për anulimin e zgjedhjeve të 30 qershorit, ndërsa pozita është kundër vendimit dhe thotë se zgjedhjet do të mbahen me këtë datë.