Kryeministri Kurti pjesë e diskutimeve në Shtëpinë e SHBA-së në Davos

Kryeministri Kurti merr pjesë në një panel diskutimi në Shtëpinë e SHBA-së në Davos

Në kuadër të Forumit Ekonomik Botëror në Davos, agjenda e ditës së sotme ka nisur në Shtëpinë e Shteteve të Bashkuara të Amerikës, ku Kryeministri në detyrë i Republikës së Kosovës, Albin Kurti, ka marrë pjesë në një panel diskutimi me temën “Besimi, Lidershipi dhe Amerika 250”, shkruan albinfo.ch.

Gjatë diskutimit, kryeministri Kurti theksoi rëndësinë e besimit si një nga shtyllat kryesore të shërbimit publik dhe kohezionit shoqëror, duke vënë në pah rolin e tij në faza të ndryshme të zhvillimit shoqëror dhe ndërtimit të shtetit.

Ai nënvizoi se besimi nuk krijohet spontanisht, por ndërtohet përmes angazhimit të vazhdueshëm, transparencës dhe veprimeve konkrete, duke shtuar se optimizmi për të ardhmen buron nga përpjekjet e pandërprera dhe aktivizmi i shoqërive demokratike.

Sipas njoftimit të Zyrës së Kryeministrisë, paneli ku mori pjesë Kurti është pjesë e iniciativës së Forumit Ekonomik Botëror “Komuniteti i Besimit në Veprim”, e cila synon të nxisë dialog dhe reflektim mbi rolin e lidershipit në ndërtimin e partneriteteve inovative.

Kjo iniciativë mbledh liderë nga vende të ndryshme të botës për të diskutuar mënyrat e përshpejtimit të bashkëpunimit ndërkombëtar, me synim adresimin e sfidave aktuale globale, veçanërisht në fushat e mjedisit, ekonomisë dhe teknologjisë, duke theksuar rëndësinë e një lidershipi të bazuar në vlera dhe besim të ndërsjellë./Albinfo.ch

---