Kryepolici “shpërblen” firmën e vëllait me tenderë

Firma e B., ka qenë e favorizuar për kohë të gjatë nga policia e kantonit, e cila i ka dhënë vazhdimisht tenderë. Që nga viti 2005 vlera e përgjithshme e tenderëve që ka marrë ajo mbërrin në 2.85 milionë franga

Një skandal i ri ka tronditur policinë e kantonit të Bernës. Shefi i policisë së këtij kantoni i ka dhënë vëllait të tij, një specialisti të IT-së tenderë nga lëmi i tij në vlerë prej 2.9 milionë frangash pa iu nënshtruar procedurës së shpalljes publike për konkurrim.  Ndërkohë autoritetet e kontrollit financiar nga Berna do të thonë fjalën e tyre nëse direktivat me këtë rast përbëjnë shkelje të ligjit, shkruan gazeta “Der Bund”.

Sipas gazetës, firma e B., ka qenë e favorizuar për kohë të gjatë nga policia e kantonit, e cila i ka dhënë vazhdimisht tenderë. Që nga viti 2005 vlera e përgjithshme e tenderëve që ka marrë ajo mbërrin në 2.85 milionë franga.

Shumica e këtyre vinë nga sektori që drejton vëllai i tij. Firma e B. ka marrë për çdo vit punë të reja në shuma gjashtëshifrore. Shpeshherë është bërë fjalë për shuma që kalojnë 300 mijë frangat ndërsa kulmi është arritur në vitin 2010 me një pagesë prej 521621 frangash.