Lajmërohet Donika Gërvalla: Jam me Covid-19, por në gjendje stabile

Ministrja e Jashtme e Kosovës, Donika Gërvalla, ka reaguar pas disa raportimeve se ajo është në gjendjen të rëndë nga virusi Covid-19

Përmes një postimi në Facebook, Gërvalla ka konfirmuar se është e infektuar me Covid-19, por ajo sqaron se gjendjen e ka stabile.

“Ndodhem tashmë në ditët e fundit të karantinës si pasojë e infektimit me Covid19 dhe jam shëndosh si molla, duke punuar çdo ditë me shumë vullnet për të përfunduar së paku një pjesë të punëve të shumta që na presin. Falë vaksinës së marrë, kam pasur fatin të mos ballafaqohem me komplikime të rënda”, ka shkruar mes tjerash Gërvalla.

Më tutje ajo ka thënë se teknologjia bën të mundur kryerjen e shumicës së detyrave edhe nga distanca, prandaj edhe gjatë karantinës ka shfrytëzuar mundësinë për të zhvilluar, ndër të tjera, edhe biseda të shumta të rëndësishme me kolegë nga e gjithë bota.

“Jo më larg se mbrëmë kam pasur një bisedë tepër interesante dhe të frytshme me ministrin e Punëve të Jashtme të Izraelit. Sfidat e kësaj pandemie janë të mëdha dhe prekin shumë aspekte të jetës sonë. E rëndësishme të mos harrojmë në asnjë moment familjet, të cilat kanë humbur të dashurit e tyre apo ballafaqohen me komplikime të rënda të të afërmve të tyre dhe që kanë nevojë për solidaritetin dhe ndihmën tonë”, shkruan tutje ajo.

“Duke u vaksinuar vetë dhe duke ndihmuar edhe në vaksinimin e miqve dhe të afërmve tanë, secili prej nesh mund të japë një kontribut të vlefshëm në kapërcimin e kësaj sfide, e cila ka përfshirë gjithë botën dhe si pjesë të kësaj bote, edhe Kosovën”.

---