Lidhja e Mjekëve Shqiptarë në Zvicër kujton Jetmir Morinën

Lidhja e Mjekëve Shqiptarë në Zvicër ka ngushëlluar familjen e Jetmir Morinës pas vdekjes së tij. “Në këto momente dhimbjeje e pikëllimi, bashkëndjemjë dhimbjen tuaj dhe shprehim ngushëllimet më të sinqerta”, thuhet në telegramin e ngushëllimit.

Jetmiri është kujtuar nga kolegët e tij si i zellshëm e human. “Shembulli i humanitetit dhe qytetarisë që ai dha deri në momentin e fundit të jetës së tij do të jetojë gjithmonë. Duke sakrifikuar jetën e tij në shërbim të të tjerëve. Dr. Jetmiri u shndërrua në hero të vërtetë dhe si i tillë do të kujtohet përherë. Ai lartësoi deri në piedestal jo vetëm misionin fisnik të mjekut por edhe shpirtin solidar vetmohues që e shquan kombin tonë”, u shprehën Lidhja e Mjekëve Shqiptarë në Zvicër, përcjellë albinfo.ch.

Dr. Jetmir Morinën e kanë kujtuar edhe shokët e gjeneratës me të cilët ka kryer studimet për stomatologji. “Të shkruash për mikun e humbur qenka shumë e vështirë. Të gjitha shoqëritë kanë liderin e tyre shpirtëror, Jetmiri ishte guida jonë shpirtërore dhe profesionale. Ai ishte i begatuar me edukatë dhe ndërgjegje të lartë morale. Pasioni i tij për shkencat mjekësore lindi si dëshire për dashurinë ndaj njerëzimit”, thuhet në shkrimin e shokëve, përcjellë albinfo.ch.

Dy ditë më parë, më 12 prill 2023 ka humbur jetën në autostradë, afër qytetit Winterthur Jetmir Morina, 30 vjeçar. Ai është goditur nga një makinë derisa po përpiqej të ndihmonte personat që kishin pësuar në një aksident tjetër, që sapo kishte ndodhur.

Jetmir Morina, është shqiptar nga Topanica e Kamenicës, stomatolog me profesion. I ndjeri kishte rreth gjashtë vite që jetonte në Zvicër dhe ishte baba i tri vajzave të vogla, përcjellë albinfo.ch.