Lucerni, letër Sommaruga-s: Të mos u njihet azili eritreanëve

Qeveria e Kantonit të Lucernit i ka shkruar letër presidentes së federatës, Simonetta Sommaruga përmes së cilës i kërkon që eritreanëve të mos u njihet më statusi i refugjatit

Më shumë se gjysma e atyre që kohëve të fundit po kërkojnë azil në Zvicër, janë nga Eritrea. Kjo ka ngjallur debat në Zvicër, duke ditur se, për shkak të situatës në vendin e prejardhjes, pothuaj të gjithë eritreanëve duhet t`u njihet azili. Gjithnjë më shumë paraqiten zëra në opinion, nga politikanë të djathtë dhe nga autoritetet se duhet përfunduar kjo praktikë.

Së fundi Qeveria e Kantonit të Lucernit është paraqitur me një kërkesë në këtë drejtim. Ajo i ka shkruar letër presidentes së federatës, Simonetta Sommaruga përmes së cilës i kërkon që eritreanëve të mos u njihet më statusi i refugjatit.

Shtimi i numrit të kërkesave për azil e vë në rrezik strehimin e azilkërkuesve, për të cilin janë bërë përpjekje që të ketë njüe nivel të pranueshëm, thuhet në letër. Një problem të veçantë paraqesin refugjatët që vijnë në Zvicër nga Eritrea. Ata e braktisin vendin e tyre për shkak të gjendjes ekonomike dhe kërcënimit me shërbimin ushtarak. Asnjëra nga këto nuk mund të pranohen si bazë për të fituar azilin.

Në letrën të cilën për qeverinë e Lucernit e ka shkruar ministri i shëndetësisë, Guido Graf (CVP) thuhet se vetëm gjatë korrikut, nga 167 azilkërkuesit e ardhur në këtë kanton, 122 janë nga Eritrea. Ky “fluks enorm nga një vend i vetëm” bën që të sillet në pikëpyetje vetë ideja e azilit. Me një praktikë tepër gjeneroze të njohjes së azilit po stimulohet një eksod masiv”, ka thëne Graf.

Ngjashëm me Qeverinë e Lucernit, shqetësimin me azilkërkuesit nga Eritrea e ka përshkruar edhe ministri në qeverinë e kantonit Schwyz Andreas Barraud (SVP). Në je intervistë dhënë gazetës “Schwyzer Urbote” ai thotë se kantonet duhet të bëhen bashkë dhe t`i japin një sinjalin qendrës në Bernë se azilkërkuesit nga regjione të caktuara nuk mund të pranohen më.