“Mbreti” i ri i mundjes, Matthias Sempach

Nga çdo garë e “Schwingerfest” kurorëzohet “Mbreti” i ri. Kësaj here mbreti quhet Matthias Sempach

Ka përfunduar të dielën në Burgdorf të Emmentalit, Kantoni i Bernës, manifestimi më i madh sportiv që mbahet tradicionalisht  në Zvicër, i njohur si “Schwingerfest”, (festa e sportit të mundjes tradicionale të Zvicrës). Ishte paraparë që në këtë festë me karakter garash të merrnin pjesë rreth 250 mijë vizitorë por kjo shifër është tejkaluar dukshëm, duke arritur në rreth 300 mijë sish.

Nga “Schwingerfest” për çdo garë kurorëzohet “Mbreti” i ri, ai që del më i miri. Kësaj here mbreti quhet Sempach Matthias. Ai vjen nga Emmentali, ka 27 vjeç dhe në finale ka mundur kolegun e tij nga grupi i Bernës, Stucki Christian.

Sempach trashëgon kështu kurorën nga Wenger Kilian, fitues i vitit 2010.

Fitorja e tij ka qenë gjithsesi e merituar. Pas shtatë fitoresh ai ka mundur në përballjen e tetë edhe sfiduesin e tij më të madh, Stuckin, për të cilin kjo ka qenë humbja e parë për këtë vit.

Festës së mundësve i është dhënë publicitet nga mediet zvicerane, sidomos ato të Zvirës gjermane, pasi që ajo transmeton vlera të traditës së Zvicrës së hershme.