Media angleze për Çupin dhe familjarët e tij, episod i trishtë

Keystone EPA/VALDRIN XHEMAJ

Së fundi, Klement Çupi është identifikuar si një prej viktimave të tërmetit të fuqishëm që shkundi Shqipërinë mëngjesin e 26 nëntorit. Çupi kishte vetëm dy ditë që ishte kthyer nga Anglia, ku edhe punonte si taksist.

Media angleze “BanburyCake” i ka kushtuar një artikull në të përditshmen e saj Çupit dhe familjarëve të tij, duke treguar edhe një episod mjaft të trishtë. Klementi ishte rikthyer në Shqipëri bashkë me të vëllanë për të festuar fejesën e vëllait të tyre të vogël, Nikolini.

Në tërmetin tragjik humbën jetën Klementi, babai i tij Hajredini dhe nëna Lute Çupi. Ndërsa vëllai i tij, Nikolini, ka mundur të shpëtojë dhe po mbahet nën kujdesin e mjekëve në spital.

Sipas medias angleze, Klementi jetonte në qytetin e Oxfordit dhe kishte ardhur në këtë qytet në moshë mjaft të re si refugjat. Ai kreu studimet në qytetin e Oxfordit dhe për një kohë të gjatë punonte si menaxher në një Pub. Së fundmi Çupi kishte punuar si shofer taksie dhe gjithmonë është dalluar mes shokësh për zgjuarsinë dhe korrektësinë e tij, përcjell albinfo.ch.