Ndryshojnë preferencat para votimeve të 18 majit

Për iniciativën kundër pedofilisë është zvogëluar përkrahja me 15% ndërsa për atë kundër blerjes së aeroplanëve luftarakë, për 2%

Deri në datën e referendumeve, më 18 maj kanë mbetur vetëm dhjetë ditë. Sondazhet e realizuara lidhur me rezultatet e pritshme tregojnë një evoluim të opinionit të votuesve. Kështu, lidhur me iniciativën kundër blerjes së aeroplanëve luftarakë “Gripen”, sondazhi i realizuar nga gfs.bern me porosinë e SRG-së regjistron një ngritje prej 2 për qind të atyre që e aprovojnë  këtë blerje, në krahasim me sondazhin e fundit. 51 për qind të të anketuarve janë shprehur kundër blerjes së aeroplanëve në fjalë ndërsa 44 % pajtohen se duhet bërë kjo blerje. Vetëm 5% të të pyeturve janë ende të pavendosur.

Shikuar sipas preferencave partiake, shumica e miratuesve të “pazarit” me “Gripen” vijnë nga SVP/UDC. 72%  të votuesve të kësaj partie janë shprehur pro. Ndërsa te SP/PS dhe të Gjelbrit ndodh e kundërta. Kundër blerjes së aeroplanëve janë 85% të përkrahësve të SP/PS dhe 82% të të gjelbërve.

Një përfundim interesant del edhe nga sondazhi lidhur me iniciativën kundër pedofilisë. Edhe ky sondazh është realizuar nga instituti g.bern me porosi të SRG, shkruan srf.ch. Në anketimin e bërë në fillim të majit, 59% të të anketuarve janë shprehur në favor të iniciativës gjegjësisht për dënimin më të ashpër të pedofilisë. 33 për qind janë kundër iniciativës dhe 8% të pavendosur.

Te kjo iniciativë shihet një ndryshim i konsiderueshëm i preferencave në krahasim me sondazhin e kaluar. Kështu, tash janë 15% më pak përkrahës të iniciativës gjegjësisht 14% më shumë kundërshtues të saj.

Shikuar në planin partiak, në SVP/UDC 80%  janë me iniciativën, në CVP/PDC janë 55% dhe në FDP 54%. Nga ana tjetër 55% të të gjelbërve janë kundër tekstit të iniciativës dhe 45% të SP/PS janë po ashtu kundër.