Në Zvicër jetojnë 1 milion e 975000 të huaj

Në fund të muajit qershor në Zvicër kanë jetuar 1 milion e 974907 të huaj gjegjësisht qytetarë pa pasaportë zvicerane. 68 për qind e tyre vijnë nga shtetet e BE-28 dhe EFTA

Sipas një njoftimi të publikuar nga Sekretariati Federal për Migracion (SEM), nga janari deri në fund të qershorit 2015 migrimi i të huajve në Zvicër është rritur për 2.2 për qind. Ose ndryshe: gjatë këtyre gjashtë muajve popullatës së përhershme të Zvicrës i janë shtuar 72308 të huaj dhe nga ana tjetër i janë larguar 33646 persona, transmeton albinfo.ch. “Saldoja” e gjithë kësaj lëvizjeje shkon në favor të atyre që kanë ardhur, gjegjësisht numri i pastër i rritjes së popullatës përmes migracionit është 35.152 sish.

Nga janari deri në qershor 2015 në Zvicër kanë migruar për të punuar gjithsej 76093 shtetas të BE-28/EFTA. Ky numër përfshin edhe personat me leje qëndrimi të shkurtër. Këto shifra dëshmojnë se migrimi i të huajve nga vendet e përmendura me qëllim pune gjatë periudhës në fjalë ka qenë konstant gjegjësisht për 0.6 më i vogël se në periudhën e njëjtë të vitit 2014.

Gjatë periudhës në përpunim në Zvicër kanë ardhur 21551 të huaj në kuadrin e bashkimit familjar. Afër 20 për qind e tyre kanë ardhur për t`iu bashkuar si pjesëtar familjeje një zvicerani ose një zviceraneje.

Viti i kontingjenteve 2015/2016 për Rumaninë dhe Bullgarinë ka filluar

Më 1 qershor 2015 për shtetasit e Bullgarisë dhe Rumanisë (BE-2) ka filluar viti i fundit i kontingjentit, përcjell albinfo.ch njoftimin e SEM. Për ta, deri më 31 maj 2016 janë në fuqi kufizimet kalimtare si përparësia që kanë vendësit, kontrolli i tregut të punës si dhe kontingjentet. Kështu, për vitin kontingjental 2015-2016 në dispozicion janë gjithsej 1207 leje qëndrimi B dhe 11.664 leje afatshkurtra L, përfundon njoftimi nga SEM.