Nënshkruhet memorandum trilateral Shqipëri, Kosovë dhe Kroaci

Kosova, Shqipëria e Kroacia nënshkruajnë Deklaratën për aleancë ushtarake

Bëhet e ditur se, me nderime të larta ushtarake, ministri i Mbrojtjes së Shqipërisë, Pirro Vengu, ka pritur homologun e tij nga Kosova, Ejup Maqedonci. Qëllimi i kësaj pritjeje ishte i një rëndësie të veçantë, përcjell albinfo.ch.

Në Tiranë është nënshkruar një memorandum trilateral në fushën e mbrojtjes. Ministrat e Mbrojtjes të Shqipërisë, Republikës së Kosovës dhe Kroacisë kanë vendosur firmat e tyre për bashkëpunim në Tiranën zyrtare.

Ministri i Mbrojtjes së Kosovës, Ejup Maqedonci, ka thënë se synimi i këtij bashkëpunimi nuk është kërcënim për askënd, por një mesazh për ata që synojnë të kërcënojnë rajonin. Sipas tij, Kosova, Shqipëria dhe Kroacia nuk do të lejojnë që askush të destabilizojë rajonin.

“Synimi i këtij bashkëpunimi nuk është kërcënim për askënd, por një mesazh për ata që synojnë të kërcënojnë rajonin. Ne u tregojmë që jemi së bashku dhe nuk do të lejojmë që askush të destabilizojë rajonin. Falënderoj ministrin e Shqipërisë dhe të Kroacisë për këtë nismë. Vlerësoj se kjo marrëveshje është e para trilaterale në rajon. Edhe një herë, kjo marrëveshje është deklaratë, është mesazh për çdo vend që ka për qëllim destabilizimin. Ne jemi bashkë dhe presim që të bashkohen edhe vende të tjera”, ka theksuar Maqedonci.

Ky memorandum i nënshkruar ka për qëllim promovimin e bashkëpunimit në ngritjen e kapaciteteve të mbrojtjes dhe industrisë së mbrojtjes, rritjen e ndërveprueshmërisë përmes edukimit, trajnimit dhe ushtrimeve, kundërveprimin ndaj kërcënimeve hibride dhe forcimin e qëndrueshmërisë strategjike, si dhe ofrimin e mbështetjes së plotë për integrimin euroatlantik dhe mbrojtjen rajonale.

---