Një shqiptar në mesin e salafistëve të kapur në Gjermani

Ata, siç ka njoftuar policia gjermane, kishin planifikuar të vrisnin kryetarin e partisë gjermane të ekstremit të djathtë "Pro NRW", Markus Beisicht (në foto)

Të mërkurën, në disa bastisje të kryera në  landin gjerman Nordrhein Westfalen janë arrestuar katër islamistë radikalë, gjegjësisht salafistë. Sipas një zëdhënësi të policisë në Essen, njësitet speciale i kanë arrestuar katër meshkuj në Leverkusen, Bonn dhe Essen, të dyshuar si pjesëtarë të lëvizjes radikale islame të salafistëve.

Ata kishin planifikuar të vrisnin pjesëtarë të partisë gjermane të ekstremit të djathtë Pro NRW, ndërsa kryetari i kësaj partie, Markus Beisicht ka qenë në rrezik të drejtpërdrejtë prej tyre, kanë thënë hetuesit policorë. Sipas tyre, te personat e dyshuar janë gjetur armë dhe mjete shpërthimi.

Në mesin e katër të arrestuarve, krahas dy turqve, një gjermani të konvertuar ne islam është edhe një shqiptar, bëjnë të ditur burimet policore gjermane, dhe transmeton “Süddeutsche Zeitung”.

Prokuroria e përgjithshme e Dortmundit, nisur nga indikacionet për krimet e planifikuara të ekstremistëve radikalë kishte iniciuar më herët një procedurë hetimi. Zëdhënësi ka thënë se tash do të shqyrtohet se si do të vazhdohet tutje me procedurën.

Partia Pro NRW, e cila mendohet të ketë qenë cak i sulmeve të planifikuara, ka provokuar myslimanët shumë herë në të kaluarën. Por, siç ka thënë ministri i brendshëm i NRW-së, Ralf Jäger, kërcënimet e ekstremistëve të djathtë nuk arsyetojnë dhunën nga salafistët.